Ötən il Azərbaycan ilə Özbəkistan arasında investisiya təşəbbüslərinin reallaşdırılması həcmi əhəmiyyətli dərəcədə artıb. Ayrı-ayrı istiqamətlər üzrə artım 20–30% təşkil edib.
Bunu Özbəkistanın Azərbaycandakı səfiri Bahrom Aşrafxanov Bakıda keçirilən “Özbəkistan – Azərbaycan: müttəfiqlik qarşılıqlı fəaliyyətinin arxitekturası” mövzusunda dəyirmi masada bildirib.
Diplomat qeyd edib ki, hazırda iki ölkənin 13 şəhəri arasında əməkdaşlıq sazişləri imzalanıb və qardaşlaşmış şəhər münasibətləri qurulub. Hökumətlərarası Komissiyanın, İşgüzar Şuranın və Dövlətlərarası Şuranın iclasları müntəzəm keçirilir.
Səfirin sözlərinə görə, əməkdaşlığın yüksək dinamikası Özbəkistan Prezidenti Şavkat Mirziyoyev ilə Azərbaycan Prezidenti İlham Əliyev arasında formalaşmış fəal və etibarlı dialoq sayəsində mümkün olub.
O vurğulayıb ki, liderlərin davamlı təmasları və görüşləri münasibətlərə müttəfiqlik xarakteri verib.