Azərbaycan Mərkəzi Bankında kapital bazarları sahəsində qanunvericilik bazasının təkmilləşdirilməsi məsələləri müzakirə olunub.
BBN.az xəbər verir ki, bu barədə AMB-nin sədri Taleh Kazımov “X” sosial şəbəkəsindəki hesabında paylaşım edib.
Onun sözlərinə görə, görüşdə Azərbaycan Kapital Bazarları Assosiasiyası, Bakı Fond Birjası, Milli Depozit Mərkəzi və investisiya şirkətlərinin rəhbər şəxsləri iştirak ediblər.
Görüş çərçivəsində 2025-ci ilin yekunları üzrə kapital bazarlarında müşahidə olunan əsas meyillər, sektorun inkişafına təsir göstərən amillər və bazar infrastrukturunun gücləndirilməsi istiqamətində görüləcək tədbirlər müzakirə olunub.
Eyni zamanda kapital bazarlarının davamlı inkişafı, investisiya şirkətlərinin maliyyə dayanıqlılığının artırılması, investor hüquqlarının qorunması və maliyyə vasitəçiliyinin dərinləşdirilməsi məsələləri diqqət mərkəzində olub.
T.Kazımov qeyd edib ki, görüşdə mövcud qanunvericilik bazasının təkmilləşdirilməsi və kapital bazarlarının inkişafını dəstəkləyən təşəbbüslər ətrafında fikir mübadiləsi aparılıb.