Azərbaycanda icbari və könüllü tibbi sığortanı inteqrasiya edən model üzərində iş aparılır.
Bu barədə məlumatı Azərbaycan Mərkəzi Bankının (AMB) Maliyyə Sektorunun Davamlı İnkişafı Departamentinin direktoru Rüstəm Tahirov AmCham tərəfindən Bakıda təşkil edilən “Bank və sığorta sektorlarının inteqrasiyası” mövzusunda keçirilən tədbirdə verib.
R.Tahirov bildirib ki, bir sıra ölkələrdə mövcud olan bu modelin tətbiqi üzərində hazırda iş gedir. Məqsəd icbari tibbi sığortanın imkanlarından istifadə etməklə sığorta şirkətlərinin risklərini azaltmaq və tibbi sığortaya əlçatanlığı artırmaqdır.
Eyni zamanda, tibbi sığorta haqqının daha münasib olması istiqamətində layihələr hazırlanır və bu sahədə müsbət nəticələrin əldə olunacağı gözlənilir.