Azərbaycanda kriptovalyuta və bütün növ virtual aktivlərin tənzimlənməsini təmin etmək məqsədilə tədris və məlumatlandırma xarakterli sənəd üzərində iş aparılır.
Bu barədə Azərbaycan Fintex Assosiasiyası (AzFina) İctimai Birliyinin İdarə Heyətinin sədri Edqar Abdullayev məlumat verib.
Onun sözlərinə görə, kriptovalyuta sahəsində gəlir mənbələrinin şəffaflığı ilə bağlı ciddi suallar mövcuddur ki, bu da maliyyə inklüzivliyi və maliyyə sabitliyi baxımından yeni risklər yaradır:
“Bu prosesdə ən vacib məsələ insanların tənzimləyici quruma – Azərbaycan Mərkəzi Bankına (AMB) və müvafiq xidmətləri göstərən subyektlərə olan etimadıdır.”
E.Abdullayev əlavə edib ki, stabilkoinlər və digər virtual aktivlərlə bağlı ilkin tənzimləyici yanaşma artıq formalaşıb:
“Hazırda stabilkoinlər və digər virtual aktivlər üzrə fundamental tənzimləyici sənədin hazırlanmasına dair ilkin plan mövcuddur. Gələcəkdə bu proses mərhələli şəkildə idarə olunacaq və ümid edirik ki, perspektivdə Mərkəzi Bank tərəfindən tənzimlənən stabilkoin də təqdim ediləcək.”
Beləliklə, Azərbaycanda virtual aktivlər sektorunun inkişafı və tənzimlənməsi istiqamətində addımlar atılır, bu da maliyyə sisteminin dayanıqlılığı və şəffaflığının artırılmasına xidmət edəcək.