Dünya ölkələrinin rəqəmsallaşmaya doğru illərdir sürətlə irəliləməsinə baxmayaraq, kriptovalyutalar hələ də bir çox istehlakçılara qaranlıq qalmaqdadır. Kriptovalyutaların içində ən çox yayılanı və ən yüksək dəyərə malik olanı isə “Bitcoin” kriptovalyutasıdır. 2009-cu ildə Satoşi Nakomoto tərəfindən ilk dəfə yaradılan “Bitcoin” kriptovalyutası nəhayət ki, 12 il sonra ilk dəfə bir ölkədə rəsmi ödəniş vasitəsi kimi qəbul edilib.
Mərkəzi Amerikada yerləşən və 6.5 milyondan artıq əhaliyə malik olan El Salvador Respublikası rəsmi valyutası olan ABŞ dolları ilə yanaşı, “Bitcoin”i də rəsmi ödəniş vasitəsi kimi qəbul edib. Ölkə prezidenti Nayib Bukele tərəfindən irəli sürülən bu təklif iyul ayında parlament tərəfindən 61% lehinə səs ilə təsdiqlənib. Prezident açıqlamasında, bu qərardan sonra ölkədə pul köçürmələri üzrə illik komissiyalara sərf edilən xərclərin 400 milyon dollar həcmində azalacağını bildirib. Qeyd edək ki, “Moody’s” ölkənin kredit qabiliyyətlilik reytinqini aşağı salıb.
Prezident Bukele “Twitter” hesabında dövlət büdcəsinə daha 200 “Bitcoin” əlavə edildiyini və bununla da ümumi büdcənin 400 “Bitcoin”ə çatdığını açıqlayıb.