Kriptovalyuta bazarında vəziyyət son günlərdə əhəmiyyətli şəkildə dəyişir. Ekspertlər bildirir ki, kriptosahəsində əsas diqqət artıq Bitkoinə deyil, digər alternativ aktivlərə yönəlib.
CAKE və BNB – yüksəlişdə olan tokenlər
Son dövrdə ən çox yüksəliş göstərən aktivlərdən biri CAKE tokenidir. Bu token, PancakeSwap adlı mərkəzləşdirilməmiş birja (DEX) tərəfindən təqdim olunur və BNB Chain platformasında fəaliyyət göstərir. Yalnız son sutka ərzində CAKE 15% dəyər qazandı, bu artım Binance-dəki müsbət tendensiyalarla izah edilir.
Eyni zamanda, Binance-in tokeni BNB 28 iyulda 850 ABŞ dollarını keçərək yeni maksimuma çatdı. Son bir həftədə BNB-nin 12% artması bazar üçün böyük göstəricidir.
Bu yüksəlişlərin əsas səbəbi isə kriptofondlara yönələn iri həcmli investisiyalardır. Çin çip istehsalçısı Nano Labs iyulun əvvəlində BNB ehtiyatlarını 160 milyon dollara qədər artırıb. Bundan başqa, Binance-in təsisçisi Çanpənq Çjao ilə əlaqəli YZi Labs şirkəti ABŞ-da fəaliyyətə başlayacaq BNB Treasury Company adlı kriptofond layihəsini dəstəkləyir.
Ethereum ön plandadır
Ekspertlər vurğulayır ki, bazarda əsas tendensiya Ethereum-un Bitkoini geridə qoymasıdır. Hazırda Ethereum-un ticarət həcmi 54 milyard ABŞ dollarıdır ki, bu da Bitkoinin göstəricisindən təxminən iki dəfə çoxdur. “Bitkoin artıq dəbdə deyil — investorlar və bazar iştirakçıları Ethereum və maliyyə mühəndisliyinə daha çox maraq göstərirlər,” – deyə mütəxəssislər bildirirlər.
ABŞ bazarı və risk iştahası
Kriptobazarındakı vəziyyətə əsas təsir ABŞ bazarından gələn xəbərlərdir. ABŞ Prezidenti Donald Trampın Federal Ehtiyat Sisteminin rəhbəri Cerom Pauella qarşı yönəlmiş təzyiqləri və faiz dərəcələrinin azaldılması çağırışları riskli aktivlərə, o cümlədən kriptovalyutalara marağı artırır.
Ekspertlər həmçinin bildirirlər ki, ABŞ iqtisadiyyatında müsbət hesabat dövrü müşahidə olunur və bu, investorlar üçün “bir neçə ay davam edə biləcək buludsuz artım dövrü” vəd edir.
Avqustda gözləntilər
Adətən avqust ayı investisiyalar baxımından passiv ay hesab olunur. Lakin bu il vəziyyət fərqli ola bilər. Xüsusilə Ethereum və əlaqəli tokenlərdə trend yönümlü hərəkətlərin davam etməsi gözlənilir.
BBN.az analizi
Hazırkı vəziyyət göstərir ki, kriptovalyutaya yatırım edənlər üçün əsas diqqət artıq Bitkoinə deyil, yüksəliş meyilli digər tokenlərə yönəlir. Xüsusilə Ethereum, BNB və CAKE investorların portfellərində ön plana çıxır. ABŞ iqtisadiyyatı və Federal Ehtiyat Sisteminin qərarları isə bu tendensiyanın davamlılığını müəyyən edəcək.