Kriptovalyuta bazarlarında hazırda “fırtına öncəsi səssizlik” hökm sürür. Dünyanın ən böyük kriptovalyutası olan Bitkoin, Federal Ehtiyat Sisteminin (FED) iclası ərəfəsində investorların ehtiyatlı davranması fonunda 65 min dollar səviyyəsində sabitləşib. İdarəetmənin yeni sədr Kevin Warşa keçməsindən sonra keçirilən bu ilk iclas bazarlar üçün kritik əhəmiyyət kəsb edir. ABŞ və İran arasında gözlənilən sülh sazişi neft qiymətlərini aşağı salmaqla qlobal iqtisadiyyat üçün müəyyən rahatlıq yaratsa da, investorlar FED-in faiz dərəcələri ilə bağlı verəcəyi qərarları və Kevin Warşın gələcək monetar siyasətə dair mesajlarını gözləyirlər. Bitkoinin son günlərdəki kiçik enişi, əslində, bazarların FED iclaslarından əvvəl ənənəvi olaraq mənfəət götürmə və mövqe alma prosesi kimi qiymətləndirilir.
Bu durğunluq fonunda Uniswap (UNI) tokeni isə əsl “ulduz” kimi parlayır. Standard Chartered-ın UNI üçün 2030-cu ilə qədər 100 dollarlıq iddialı qiymət hədəfi qoyması və cari ilin sonuna kimi 6.50 dollar proqnozu investorların diqqətini bu platformaya yönəldib. Uniswap-ın artıq sadəcə idarəetmə tokeni deyil, aktivlərin geri alınması və yandırılması yolu ilə deflyasiya xarakterli bir aktivə çevrilməsi, həmçinin tokenləşdirilmiş aktivlər üzrə trilyonluq həcmlərə çatması tokenin dəyərini sürətlə artırır. Hazırda bazarın gözü-qulağı FED-in yeni rəhbərinin çıxışında olsa da, analitiklər rəqəmsal aktivlər üçün uzunmüddətli perspektivin hələ də yüksələn xətt üzrə davam etdiyini bildirirlər.