Birləşmiş Millətlər Təşkilatının (BMT) Təhlükəsizlik Şurasında Rusiyanın taxıl sazişini ləğv etmək qərarının təsirləri müzakirə edilib.
BMT Rusiyanın Qara Dəniz Taxıl Dəhlizi Müqaviləsini ləğv etmək qərarının qlobal ərzaq qiymətlərinə və inkişaf etməkdə olan ölkələrə geniş təsir göstərəcəyi barədə bu ölkəni xəbərdarlıq edərək, Moskvanı razılaşmaya qayıtmağa çağırıb.
Rusiyanın razılaşmaya qayıtmasının vacibliyini vurğulayan bir çox üzv dövlət də sıx səylərinə görə Türkiyə və BMT-yə təşəkkür edib.
Burada çıxış edən BMT baş katibinin siyasi və sülh quruculuğu üzrə köməkçisi Rosemary DiCarlo Rusiyanın qərarından sonra qlobal ərzaq qiymətlərinin artmağa başladığına diqqət çəkib.
DiCarlo qeyd edib ki, Rusiyanın bu addımı mövcud kənd təsərrüfatı, enerji və maliyyə böhranlarını daha da gücləndirəcək.
Rusiyanın Ukraynadakı limanlara hücumunun ərzaq təhlükəsizliyinə əlavə zərbə vurduğuna diqqət çəkən DiKarlo, hücumların mülki vətəndaşların da itkisinə səbəb olduğunu bildirib.