bp şirkəti Azəri-Çıraq-Günəşli yataqlar blokunda həyata keçirdiyi dərin qaz layihəsinin gələcəkdə iri həcmli investisiyalara səbəb ola biləcəyini açıqlayıb.
Məlumata görə, bp-nin Azərbaycan, Gürcüstan və Türkiyə üzrə regional prezidenti Cio Kristofoli jurnalistlərə bildirib ki, şirkət AÇG-də qeyri-assosiasiyalı qazın hasilatı məqsədilə qazılmış ilk quyunu artıq istismara verib. Layihə çərçivəsində ikinci quyunun da yaxın vaxtlarda istifadəyə verilməsi planlaşdırılır.
Onun sözlərinə görə, növbəti mərhələdə əldə olunan hasilat göstəriciləri və geoloji məlumatlar ətraflı təhlil ediləcək. Bu qiymətləndirmənin nəticələrindən asılı olaraq, AÇG yataqlarının dərin qatlarında yerləşən qaz ehtiyatlarının işlənməsi üçün milyardlarla dollar dəyərində yeni investisiya qərarları qəbul oluna bilər.
bp rəsmisi vurğulayıb ki, layihənin uğurla reallaşması Azərbaycanın qaz hasilatı imkanlarının genişlənməsinə və ölkənin enerji sektorunda yeni inkişaf mərhələsinin başlanmasına töhfə verə bilər.
Xatırladaq ki, AÇG Azərbaycanın ən iri neft yataqları kompleksidir və onun operatoru bp şirkətidir. Dərin qaz layihəsi isə neft laylarının altında yerləşən qaz ehtiyatlarının kommersiya baxımından potensialının öyrənilməsini hədəfləyir.