BP-nin Xəzər regionu üzrə vitse-prezidenti Bəxtiyar Aslanbəyli maliyyə cinayətləri və fırıldaqçılıqla mübarizədə texnologiyanın inkişafına baxmayaraq, həlledici rolun insan faktoruna aid olduğunu bildirib.
O, bu fikirləri AmCham Azerbaijan tərəfindən təşkil olunan “Azərbaycanda ilk Risk və Dayanıqlılıq Konfransı”nda səsləndirib.
Bəxtiyar Aslanbəyli qeyd edib ki, risklərin idarə olunması zamanı adətən texniki həllərə, proqram təminatlarına və qanunvericilik tələblərinə üstünlük verilir. Onun sözlərinə görə, istənilən sistemin effektivliyi onu idarə edən insanların peşəkarlığı və etik yanaşmasından asılıdır.
“Ən müasir monitorinq sistemi və ya süni intellekt belə, əgər onu idarə edən mütəxəssislərin etik dəyərləri və peşəkar hazırlığı yoxdursa, uğursuzluğa məhkumdur”, – deyə o bildirib.
BP rəsmisi vurğulayıb ki, maliyyə fırıldaqçılığı ilə mübarizədə ən effektiv yanaşma preventiv tədbirlərin həyata keçirilməsidir. Bunun üçün şirkətlərdə şəffaflıq və hesabatlılığa əsaslanan daxili nəzarət mühitinin formalaşdırılması vacib hesab olunur.
Onun sözlərinə görə, “Big Data” texnologiyalarının imkanları sayəsində artıq şübhəli tranzaksiyaları real vaxt rejimində izləmək mümkündür. Bununla yanaşı, əməkdaşların, müştərilərin və tərəfdaşların risklər barədə maarifləndirilməsi də mühüm əhəmiyyət daşıyır.
Bəxtiyar Aslanbəyli dövlət və özəl sektor arasında əməkdaşlığın vacibliyinə də diqqət çəkib. O bildirib ki, maliyyə cinayətləri sərhəd tanımadığı üçün bu sahədə tək bir qurumun effektiv mübarizə aparması mümkün deyil.
“Məlumat mübadiləsi və ortaq platformaların yaradılması effektivliyi artırır. Texnologiya yalnız alətdir, əsas məsələ isə strateji baxış və dürüst yanaşmadır”, – deyə BP rəsmisi əlavə edib.