Beynəlxalq Valyuta Fondu (BVF) Ukrayna hakimiyyətini 8,1 milyard dollarlıq yeni kredit proqramı çərçivəsində razılaşdırılmış struktur islahatları sürətlə həyata keçirməyə çağırıb.
BVF-nin Ukrayna üzrə missiya rəhbəri Gevin Qrey Vaşinqtonda jurnalistlərə bildirib ki, Fondun İcraiyyə Şurası tərəfindən təsdiqlənmiş yeni kredit paketi çərçivəsində Ukrayna bir sıra islahatlar öhdəliyi götürüb. Bu islahatlara əlavə dəyər vergisi (ƏDV) həddi ilə bağlı dəyişikliklər də daxildir və onların mart ayının sonunadək qəbul edilməsi nəzərdə tutulur.
Qreyin sözlərinə görə, dəyişikliklərin nə qədər tez qüvvəyə minməsi bir o qədər müsbət nəticə verə bilər.
O qeyd edib ki, Ukraynanın büdcə xərcləri yüksək olaraq qalacaq, lakin fiskal siyasət mövcud maliyyə imkanları çərçivəsində həyata keçirilməlidir. Müdafiə, yenidənqurma və sosial müdafiə xərcləri üçün xarici tərəfdaşların dəstəyi vacibdir, lakin bu, kifayət etməyəcək.
BVF rəsmisi vurğulayıb ki, Ukrayna kölgə iqtisadiyyatı ilə mübarizəni gücləndirməli, vergi yayınmalarını azaltmalı və daxili gəlirləri artırmalıdır. Məqsəd artıq vergi ödəyən kiçik qrupun yükünü artırmaq deyil, vergi sistemindəki boşluqları aradan qaldırmaqdır.
ƏDV və gömrük mexanizmləri ilə bağlı dəyişikliklər yerli şirkətlərin rəqabət qabiliyyətini artırmağa yönəlib. Bildirilib ki, ƏDV həddinin artırılması mümkündür, lakin bu göstərici Avropa İttifaqı tələblərinə uyğun olaraq 85 min avronu keçməməlidir.
BVF nümayəndələri əlavə ediblər ki, islahatların uğuru Ukraynanın Avropa İttifaqına inteqrasiya məqsədləri, donorların etimadının qorunması və xarici investisiyaların cəlbi baxımından həlledici əhəmiyyət daşıyır.
Fond həmçinin Ukraynanın dövlət idarəçiliyinin gücləndirilməsi və korrupsiyaya qarşı mübarizənin dərinləşdirilməsinin vacibliyini vurğulayıb. BVF-yə görə, müharibədən sonrakı dövrdə ölkənin iqtisadi artım perspektivləri məhz idarəetmə keyfiyyətindən asılı olacaq.