Dünya gümüş bazarında ciddi gərginlik yaranıb. Çində gümüş ehtiyatlarının son on ilin ən aşağı səviyyəsinə düşməsi qiymətləri kəskin yüksəldib və metal Londona böyük həcmdə daşınıb. Nəticədə gümüşün qiyməti tarixi maksimuma çatıb.
Şanxay Fyüçers Birjasının məlumatına görə, birjaya bağlı anbarlardakı ehtiyatlar 2015-ci ildən bəri ən aşağı həddə enib. Şanxay Qızıl Birjasında ticarət aktivliyi də son doqquz ilin minimum səviyyəsinə düşüb. Çin oktyabr ayında rekord — 660 ton gümüş ixrac edib.
Gümüş defisiti və qiymət artımı
“Jinrui Futures” analitiki Tsiztsze U bildirir ki, defisit həm sənaye tələbinin artması, həm də Londona ixracın çoxalması ilə bağlıdır. Onun sözlərinə görə, defisitin təxminən iki aya aradan qalxacağı gözlənilir.
Gümüşün qiyməti son bir ildə 80% artaraq ardıcıl tarixi rekordlar yeniləyib. Artım qızıl bazarındakı bahalaşma fonunda da sürətlənib. ABŞ-yə mümkün gömrük rüsumları ilə bağlı gözləntilər metala tələbi artırıb və London bazarına axını gücləndirib. Hindistanda tələbin kəskin yüksəlməsi də qlobal bazarı gərginləşdirib.
Risklər və ABŞ rüsumları narahatlıq yaradır
“TD Securities” strateqi Daniel Qali qeyd edir ki, ABŞ-nin gümüşə rüsum tətbiq etməsi artıq ölkəyə daxil olmuş metalın bloklanmasına səbəb ola bilər. Bu isə Şanxay bazarları üçün ciddi çətinlik yaradar.
Çində aşağı ehtiyatlar səbəbindən yaxın fyüçerslərin qiyməti uzaq kontraktları ötüb. Bu vəziyyət “bekvordasiya” kimi tanınır və təklifin qeyri-elastik olduğunu göstərir.
Vergi dəyişikliyi də tələbi artırıb
Çində ƏDV güzəştlərinin qızılın bəzi növlərinə tətbiqinin ləğvi pərakəndə tacirləri gümüşə yönəldib. Şençjenin Şuibey bazarındakı mütəxəssislər bildirirlər ki, yeni qaydalar qızıl məhsullarının qiymətinin müəyyənləşdirilməsini çətinləşdirib və tacirlər alternativ olaraq gümüşə keçir.
Beynəlxalq bazarlarda vəziyyət
Çərşənbə günü spot gümüşün qiyməti unsiya üçün 52 dolları keçib. Buna baxmayaraq, Londonda borclanma dəyəri yüksək olaraq qalır və bu, bazarın likvidliyinə dair suallar yaradır.
ETF-lərdə əhəmiyyətli artım müşahidə olunmur, qiymətlər rekord səviyyədən geri çəkilsə də, fond həcmləri stabil qalıb. Treyderlər Çinin birja xaricindəki ehtiyatlarının bərpasını gözləyirlər, lakin bu “görünməyən” ehtiyatların həcmi dəqiq bilinmir.