Çərşənbə günü beynəlxalq maliyyə bazarlarında investorların diqqəti ABŞ Federal Ehtiyat Sisteminin (Fed) gözlənilən faiz endirimi qərarına yönəlib. Qərarın bu gün açıqlanması gözlənilir.
BBN.az xəbər verir ki, ABŞ dolları əsas valyutalara qarşı zəifləyib. Dollar indeksində azalma müşahidə olunur. Avro son 4 ilin maksimumuna – 1,1867 ABŞ dollarına qədər yüksəlib. Yapon yeni qarşısında isə dollar 146,52 səviyyəsində stabilləşib.
Qızılın bir unsiya üzrə qiyməti 3 700 ABŞ dollarını keçərək yeni rekord səviyyəyə çatıb. İnvestorların riskdən qaçınma meyli fonunda qızıl “təhlükəsiz liman” kimi dəyər qazanıb.
Səhm bazarlarında da eniş müşahidə olunub. ABŞ və Asiya indeksləri zəifləyib. MSCI Asiya-Sakit Okean indeksi 0,2%, Yaponiyanın Nikkei 225 indeksi isə 0,1% azalıb.
FED-in 0,25 faiz bəndi qədər endirimə gedərək faiz dərəcəsini 4,00–4,25% aralığına salacağı gözlənilir. Bazar iştirakçıları sədr Cerom Pauellin qərardan sonrakı çıxışına və gələcək siyasət siqnallarına diqqət yetirəcək.
Eyni zamanda, Kanada Bankının da zəif əmək bazarı səbəbilə faiz endirimi qərarı verəcəyi ehtimal olunur.
Brent markalı neftin qiyməti $64,49 səviyyəsində stabilləşib. Bu, əvvəlki üç günlük artımdan sonra qeydə alınıb. Rusiya infrastrukturuna edilən dron hücumları ilə bağlı risklər bazarda qiymət sabitliyini qoruyur.