“Dayanıqlı və Operativ Sosial Təminat Agentliyi” Publik Hüquqi Şəxsi (DOST Agentliyi) regionlarda yerləşən inzibati binaların əsaslı təmir işlərinin satın alınması məqsədilə bir neçə açıq müsabiqə elan edib.
Məlumata görə, ilk müsabiqə Salyan və Hacıqabul rayonlarında, həmçinin Biləsuvar şəhərində yerləşən DOST Agentliyinin filial binalarının əsaslı təmir işlərini əhatə edir. Bu müsabiqə üzrə ehtimal olunan qiymət 2 milyon 415 min manat təşkil edir.
Digər müsabiqə Qax, Zaqatala və Qəbələ şəhərlərində yerləşən DOST Agentliyinin inzibati binalarının əsaslı təmiri ilə bağlıdır. Sözügedən satınalma üzrə ehtimal olunan dəyər 2 milyon 671 min manat olaraq müəyyən edilib.
Üçüncü açıq müsabiqə isə Xaçmaz və Qusar şəhərlərində yerləşən inzibati binaların əsaslı təmirini nəzərdə tutur. Bu müsabiqənin ehtimal olunan qiyməti 2 milyon 180 min 403 manatdır.
Qeyd edək ki, hər üç müsabiqə üzrə satınalan təşkilat “Dayanıqlı və Operativ Sosial Təminat Agentliyi” Publik Hüquqi Şəxsidir.