Dünya Bankı qarşıdakı üç il ərzində Azərbaycanda inflyasiya səviyyəsinin tədricən aşağı düşəcəyini proqnozlaşdırır. Belə ki, 2025-ci ildə inflyasiya 4,6 faiz, 2026-cı ildə 3 faiz, 2027-ci ildə isə 2,8 faiz səviyyəsinə enəcək.
Müqayisə üçün qeyd edək ki, son illərdə ölkədə inflyasiya dəyişkən olub: 2021-ci ildə 6,7 faiz, 2022-ci ildə 13,8 faiz, 2023-cü ildə 9 faiz və 2024-cü ildə 2,1 faiz təşkil edib.
Dünya Bankının hesabatında bildirilir ki, 2025-ci ilin qalan dövründə inflyasiyanın azalma tendensiyasını davam etdirəcəyi və Mərkəzi Bankın hədəf diapazonunda (4 ± 2 faiz) qalacağı gözlənilir. İnflyasiyanın pik səviyyəsi artıq geridə qalıb və əhəmiyyətli xarici şoklar baş vermədiyi halda göstəricinin orta müddətli perspektivdə AMB-nin hədəf parametrləri çərçivəsində tədricən azalacağı proqnozlaşdırılır.
Hesabatda qeyd olunur ki, inzibati qiymətlərin kəskin artımı baş verməzsə, daxili tələbin zəifləməsi fonunda inflyasiyanın 2026–2027-ci illərdə orta hesabla 2,9 faizədək azalacağı gözlənilir.