2025–2026-cı illərdə neft ucuzlaşacaq, qaz bazarında dalğalanma olacaq.
BBN.az xəbər verir ki, “The Economist Group”un araşdırma və təhlil bölməsi olan Economist Intelligence Unit (EIU) növbəti iki ilə dair enerji bazarı ilə bağlı proqnoz açıqlayıb.
Məlumata əsasən, Brent markalı neftin orta qiyməti 2025-ci ildə 67,1 ABŞ dolları/barel, 2026-cı ildə isə 63 dollar/barel olacaq. Bu isə neft bazarında eniş tendensiyasının davam edəcəyini göstərir.
Təbii qaz bazarında isə qiymətlərin dəyişkənliyi gözlənilir. Belə ki, Henry Hub üzrə qiymət 2025-ci ildə 4,1 dollar/mmBtu-a yüksələcək və 2026-cı ildə də bu səviyyədə qalacaq. Avropa bazarında isə 2025-ci ildə qazın qiyməti 12,1 dollar/mmBtu, 2026-cı ildə isə azalaraq 9,3 dollar/mmBtu səviyyəsində proqnozlaşdırılır.
EIU-nun qiymətləndirməsinə görə, yaxın iki ildə qlobal enerji bazarında əsas tendensiya neft qiymətlərinin azalması və qaz bazarında dalğalanmalar olacaq.
Qeyd edək ki, Azərbaycanın dövlət büdcəsində neftin orta qiyməti bu il üçün 70 dollar, 2026-cı il üçün isə 65 dollar nəzərdə tutulub.