Qlobal sosial media şəbəkələrinin bir çoxunu özündə cəmləşdirən “Facebook” (indiki adı “Meta”) şirkəti rəqəmsal valyuta layihəsinə son verib. “Diem” adlandırılan bu layihənin planlanması və start verilməsi 2019-cu ilə təsadüf etsə də, ilkin mərhələlərdən tənzimləyici qurumlar ilə problemlər yaşanıb.
Belə ki, “Facebook” şirkətinin istifadəçi məlumatları ilə bağlı bir neçə məsələlərdə adının hallanması səbəbindən beynəlxalq maliyyə institutları və tənzimləyici orqanlar şirkətin rəqəmsal maliyyə xidmətləri bazarına girməsinə təsdiq verməyib.
Bu səbəbdən 2022-ci ildə test mərhələsinə başlanılması planlaşdırılan “Diem” layihəsi dayandırılıb. Layihə üçün istifadəsi planlaşdırılan texnologiya isə Kaliforniya mərkəzli “Silvergate Capital Corporation” tərəfindən kriptovalyuta layihələrində istifadə edilmək üçün satın alınıb. Satınalmanın ümumi həcminin 182 milyon dollar olduğu açıqlanıb.