ABŞ Federal Ehtiyat Sistemində (FED) faiz endiriminin vaxtı və miqyası ilə bağlı ziddiyyətli siqnallar bazarlarda qeyri-müəyyənliyi gücləndirib.
BBN.az xəbər verir ki, investorlar riskdən qorunmaq üçün swap opsionları (swaptions) və gecəlik faiz dərəcələrinə bağlı digər törəmə alətlər üzrə hedcləmə əməliyyatlarını artırıblar.
Xüsusən də uzunmüddətli – 10 və 30 illik faiz dərəcəsi svopları üzrə üç aya qədər olan qısamüddətli volatillik, uzun müddətli sabitlik dövründən sonra yenidən yüksəlməyə başlayıb. Bu, investorların FED-in siyasət trayektoriyasına dair aydın istiqamət görmədiklərini göstərir.
Məlumatlara əsasən, SOFR (Secured Overnight Financing Rate) üzrə opsionlarda açıq mövqelərin sayı da artıb ki, bu da bazar iştirakçılarının həm faiz endiriminə, həm də gecikmiş qərarlara qarşı balanslı mövqe tutmağa çalışdığını göstərir.
Hedcləmə əməliyyatlarının yüksəlməsi, FED daxilindəki fikir ayrılıqlarının yaxın aylarda pul siyasəti ilə bağlı gözləntilərə təsir etməyə davam edəcəyinə işarə edir.