Azərbaycanda ev təsərrüfatlarına verilən ipoteka kreditlərinin təxminən 80 faizi dövlət hesabına, İpoteka və Kredit Zəmanət Fondu (İKZF) vasitəsilə həyata keçirilir.
Bu barədə beynəlxalq reytinq agentliyi “Fitch Ratings” öz qiymətləndirməsində məlumat yayıb.
Agentliyin hesabatında qeyd olunur ki, İKZF aşağı faizli maliyyə resurslarını bazara yönəltməklə mənzillərin əlçatanlığını artırır və dövlətin milli mənzil siyasətinin əsas icraçısı kimi çıxış edir.
“Fond kommersiya məqsədi daşımayan, lakin aşağı maliyyətli maliyyə resursları ilə dəstəklənən gəlirli dövlət qurumudur. 2024-cü ildə mənfəəti 23,2 milyon manat olub və əvvəlki illə müqayisədə dəyişməyib. Kredit portfelinin tədrici genişlənməsi hesabına faiz gəlirlərinin artması əmək xərclərinin yüksəlməsi ilə kompensasiya olunub. Aktivlərin keyfiyyəti güclü olaraq qalır – problemli kreditlərin payı ipoteka və kirayə mənzil mexanizmi portfelinin 0,1%-dən azdır,” – hesabatda qeyd olunur.
Xatırladaq ki, “Fitch Ratings” İKZF-nin uzunmüddətli xarici və yerli valyutada olan reytinqlərini “BBB-” səviyyəsində təsdiqləyib, proqnozu isə “Stabil” olaraq saxlayıb.