Azərbaycanın dövlət büdcəsində qeyri-neft gəlirlərinin payı 2026-cı ildə ümumi daxilolmaların 57 %-dən çoxunu təşkil edəcək.
Bu barədə Fitch Solutions beynəlxalq analitik şirkətinin hesabatında bildirilib. Qeyd olunur ki, 2026-cı ildə fiskal siyasət neft gəlirlərindən asılılığın tədricən azaldılmasına yönəlmiş konservativ yanaşma əsasında qurulacaq.
Hesabata əsasən, hökumət dövlət büdcəsi kəsirinin ÜDM-in təxminən 1,9 %-i səviyyəsində olacağını gözləyir ki, bu da 2025-ci ilin göstəricisinə uyğundur. Gəlir və xərclərin illik artımı təxminən 0,7 % səviyyəsində proqnozlaşdırılır. Bu isə neft bazarındakı qeyri-müəyyənlik fonunda şüurlu məhdudiyyət siyasətini əks etdirir. Qeyri-neft gəlirlərinin isə 2026-cı ildə ikirəqəmli templə artacağı gözlənilir.
Müəlliflər vurğulayırlar ki, bu proses Azərbaycan Respublikası Dövlət Neft Fondundan transfertlərin 11 % azalması ilə müşayiət olunacaq və bu, uzunmüddətli fiskal dayanıqlılığa mərhələli keçidin göstəricisi kimi qiymətləndirilir.
Qeyd olunub ki, 2025-ci ildə dövlət büdcəsinə qeyri-neft-qaz sektoru üzrə daxilolmalar 20,3 milyard manatı ötərək ümumi büdcə gəlirlərinin 51,9 %-ni təmin edib. Bu göstərici 2024-cü illə müqayisədə 3,6 % artım deməkdir.
2026-cı il üçün büdcə gəlirləri 38 milyard 609 milyon manat (2025-ci ilin təsdiq olunmuş göstəricisindən 0,7 % çox), xərclər isə 41 milyard 703,6 milyon manat (+0,7 %) məbləğində təsdiqlənib.
Eyni zamanda, 2026-cı ilin icmal büdcəsində qeyri-neft gəlirlərinin payı cari illə müqayisədə 5 faiz bəndi artaraq 63 %-ə çatacaq. 2029-cu ilə olan proqnozlara əsasən isə bu göstəricinin 69-70 %-ə qədər yüksələcəyi gözlənilir.