ABŞ-ın aparıcı investisiya bankı Goldman Sachs 2025 və 2026-cı illər üçün qlobal mis təklifi proqnozunu aşağı salıb. Bu qərar İndoneziyanın Grasberg mis mədənində sentyabrın 8-də baş vermiş palçıq axını səbəbilə istehsalın müvəqqəti dayanması ilə bağlıdır. Hadisə nəticəsində yerin altında qalan işçilərin təhlükəsizliyi üçün mədən operatoru Freeport-McMoRan “force majeure” elan edib.
BBN.az xəbər veri ki, qlobal mis bazarında təklifin azalması fonunda metalın tələbatı isə artmaqda davam edir. Bunun əsas səbəbi elektrik avtomobilləri, yenilənə bilən enerji və elektronika kimi sahələrdə misə olan tələbatın sürətlə yüksəlməsidir. Sənaye sahələrində geniş istifadə olunan misə artan ehtiyac, təklifin məhdudlaşması ilə birləşərək qiymətlərin yüksəlməsi riskini gücləndirir.
Ekspertlər bildirirlər ki, Grasberg mədənində yaranan istehsalat probleminin bazara təsiri xüsusilə qısa və orta müddətdə qiymət volatilliyini artıracaq. Bu isə qlobal sənaye və enerji layihələrinin maya dəyərinə təsir göstərə, bəzi ölkələrdə isə xammal idxalında çətinliklər yarada bilər.
Azərbaycan üçün də bu proseslər müəyyən dolayı təsirlərə malik ola bilər. Misin qlobal qiymətlərindəki artım ölkədə istifadə olunan sənaye məhsullarının maya dəyərinə təsir etməklə yanaşı, ixrac bazarlarında rəqabətə təsir edə bilər. Eyni zamanda, qlobal xammal bazarlarının volatilliyi Azərbaycanın iqtisadi siyasətində diversifikasiyanın vacibliyini bir daha önə çıxarır.