“Google” xidmətinin sahibi olan “Alphabet” şirkəti 2021-ci ilə qədər yeni işə götürülən əməkdaşların sayını azaldacağını açıqlayıb. Bunun səbəbi kimi isə, koronavirus pandemiyası nəticəsində iqtisadiyyatın yavaşlaması ilə yanaşı, gəlirlərin maksimallaşdırılması üçün xərclərin azaldılması da göstərilib. Bu barədə, şirkətin CEO-su Sundar Pichai çərşənbə günü ictimaiyyətə açıqlama verib.
Məlumat üçün qeyd edək ki, pandemiya dövründə “Alphabet” şirkəti məktəblərə distant təhsil üçün 4000 Chromebook paylamaqla yanaşı, 800 milyon dollar həcmində dəstək qrantları da ayırıb. 120 minə yaxın işçisini məsafədən işə cəlb edən texnologiya nəhəngi hal-hazırda Böyük Britaniya mərkəzli “NHSX” qurumu ilə koronavirusla mübarizə üçün mobil tətbiqetmə hazırlanması üzərində çalışır.