Təmassız ödənişlər artıq uzun bir müddətdir ki davam edən maliyyə tendensiyasıdır və bəzi inkişaf etmiş ölkələrdə hətta istehlakçılar üçün əvəzedilməz bir ödəniş vasitəsinə çevrilib. Bununla belə, əksər ölkələr kartla ödənişlərin, xüsusilə də təmassız ödənişlərin cəmiyyət tərəfindən qəbul edilməsi üçün bir sıra hüquqi tənzimləmələrə əl atırlar.
Bu sahədə ən sürətlə irəliləyən ölkə Rusiya Federasiyasıdır. Belə ki, ölkədə 2017-ci ildə illik dövriyyəsi 540 min avrodan yuxarı olan bütün müəssisələrin kartla ödəniş qəbul etməsi zəruriləşdirildi. Bunun nəticəsində 2018-ci ildə kartla ödəniş qəbul edən müəssisələrin sayı 22% artıb. 2020-ci ildə qanunvericilikdə edilən tənzimləməyə görə sözügedən dövriyyə göstəricisi illik 270 min avroya endirilib. Rusiya hökuməti 2023-cü ilədək ölkədəki bütün müəssisələrdə kartla ödənişin qəbulunu zəruriləşdirəcəyini açıqlayıb.
Yunanıstanda isə nağd pul istifadəsinin qismən məhdudlaşdırılması və bir sıra biznes sahələri üçün təmassız ödənişlərin qəbulunun məcburi edilməsi nəticəsində kartla ödəniş qəbul edən müəssisələrin sayı 2014-cü il göstəricisinə nəzərən 5 dəfə çoxdur. Polşa və Ukrayna Respublikalarında da təmassız ödənişlərin qəbulunda 20%-lik artım qeydə alınıb.