19–23 may 2025-ci il tarixlərində ABŞ-Azərbaycan Ticarət Palatası (USACC) və Azərbaycan Banklar Assosiasiyasının (ABA) birgə təşkilatçılığı ilə keçirilən “Bank Uyğunluğunun və Maliyyə Bütövlüyünün Təkmilləşdirilməsi” adlı İkinci Bankçılıq Missiyası uğurla başa çatıb.
ABA-nın nəzdində fəaliyyət göstərən “Komplayns Ekspert Qrupu”nun nümayəndələrinin də iştirakı ilə baş tutmuş ikinci bankçılıq missiyasının əsas məqsədi ABŞ ilə tənzimləyici əməkdaşlığın gücləndirilməsi və maliyyə uyğunluğu sahəsində imkanların genişləndirilməsi olmuşdur.
Qeyd edək ki, son illər Azərbaycan və ABŞ bankları arasında maliyyə sahəsində əməkdaşlıq əhəmiyyətli dərəcədə genişlənmiş, bu isə ticarət və biznes əlaqələrinin inkişafı üçün yeni imkanlar yaratmışdır. Azərbaycanın bank sisteminə artan inam və maliyyə institutlarının peşəkarlığının yüksəlməsi ABŞ bankları ilə güclü müxbir əlaqələrinin qurulmasında mühüm rol oynayıb.
Missiya çərçivəsində nümayəndə heyəti ABŞ Maliyyə Nazirliyinin Xarici Aktivlərə Nəzarət Ofisi (OFAC), Maliyyə Cinayətlərinə Qarşı Mübarizə Şəbəkəsi (FinCEN), ABŞ Dövlət Departamenti, Nyu-York Federal Ehtiyat Bankı, Amerika Banklar Assosiasiyası, Citibank, BNY Mellon, Moody’s, Dentons hüquq şirkəti və Sertifikatlaşdırılmış Antipul Yuma Mütəxəssisləri Assosiasiyası (ACAMS) ilə görüşlərdə iştirak edib.