2026-cı ilin birinci rübündə pul köçürmə sistemləri vasitəsilə Azərbaycana 296,9 milyon ABŞ dolları məbləğində pul baratı daxil olub.
Bunu Azərbaycan Mərkəzi Bankının Statistika departamentinin direktoru Samir Nəsirov tədiyə balansının açıqlanmasına həsr olunmuş brifinqdə bildirib.
Onun sözlərinə görə, hesabat dövründə Azərbaycana ən çox pul köçürmələri Rusiyadan həyata keçirilib. Belə ki, Rusiyadan ölkəyə 110,8 milyon ABŞ dolları göndərilib. Sonrakı yerlərdə 49,9 milyon dollarla Türkiyə, 24,6 milyon dollarla İrlandiya, 23,9 milyon dollarla ABŞ və 10,5 milyon dollarla Birləşmiş Krallıq qərarlaşıb.
Samir Nəsirov qeyd edib ki, 2026-cı ilin ilk üç ayında Azərbaycandan xarici ölkələrə göndərilən pul baratlarının ümumi həcmi 103,9 milyon ABŞ dolları təşkil edib.
Azərbaycandan ən çox vəsait köçürülən ölkə Türkiyə olub. Bu ölkəyə 28,2 milyon dollar göndərilib. ABŞ-a 16,2 milyon dollar, Rusiyaya 10,2 milyon dollar, Birləşmiş Krallığa 6 milyon dollar və Gürcüstana 5,6 milyon dollar həcmində pul köçürməsi həyata keçirilib.