Beynəlxalq Valyuta Fondu (IMF) koronavirus pandemiyası səbəbindən 25 üzvünün borc yükünü yüngülləşdirəcəyini açıqlayıb. Təşkilatın direktoru Kristalina Georgiyeva açıqlamasında bildirib ki, fonda üzv olan ən kasıb və ən çox koronavirus pandemiyasının mənfi təsirlərinə məruz qalan ölkələrə borc yükünü yüngülləşdirmək məqsədilə qrant ayrılacaq. Beləliklə, bu ölkələrin kredit borcu az olduğundan xaricdən daha rahat maliyyə vəsaiti cəlb edə biləcək və koronavirusun ölkə daxilində qarşısının alınması üçün daha sərt tədbirlər həyata keçirə biləcək.
Borc yükünün yüngülləşdirilməsi üçün maliyyə vəsaiti fondun Fəlakətlərin Qarşısının Alınması və Zərərlərin Yüngülləşdirilməsi Ehtiyatından (CCRT) ayrılacaq. CCRT-dən cari vəziyyət üçün 25 ölkəyə 500 milyon dollar həcmində qrant ayrılacaq. 2015-ci ildə tüğyan edən Ebola virusu səbəbindən təsis edilən CCRT-nin əsas donorları isə Yaponiya, Böyük Britaniya, Çin və Niderland olub.
Qrantların ayrılacağı ölkələr arasında Benin, Burkina Faso, Çad, Komoro adaları, Konqo Demokratik Respublikası, Qambiya, Qvineya, Qvineya Bisau, Liberiya, Madaqaskar, Malavi, Mali, Mərkəzi Afrika Respublikası, Mozambik, Niger, Ruanda, San Tome və Prinsipi, Sierra Leone, Solomon adaları, , Toqo kimi Afrika ölkələri ilə yanaşı, Əfqanıstan, Nepal, Haiti, Tacikistan və Yəmən də yer alır.