Beynəlxalq Valyuta Fondunda (IMF) Azərbaycanın daxil olduğu İsveçrə Seçki Qrupu üzrə icraçı direktor Patrik Loşevski Ağdam, Xankəndi və Şuşa şəhərlərinə səfər edib.
BBN.az xəbər verir ki, bu barədə Azərbaycan Respublikasının Maliyyə Nazirliyi məlumat yayıb.
Səfər çərçivəsində icraçı direktora işğal dövründə tamamilə dağıdılmış Ağdamda aparılan genişmiqyaslı bərpa və yenidənqurma işləri, şəhərin Baş Planının icrası, müasir infrastrukturun qurulması, eləcə də Böyük Qayıdış Proqramı çərçivəsində əhalinin mərhələli şəkildə köçürülməsi barədə ətraflı məlumat verilib.
P.Loşevski Xankəndidə mərkəzi hissə və əsas infrastruktur obyektlərinin fəaliyyəti, aparılan bərpa və yenidənqurma işləri, sosial infrastrukturun təşkili və sakinlərin yaşayış şəraitinin yaxşılaşdırılması istiqamətində görülən tədbirlərlə də tanış olub.
Şuşaya səfər zamanı isə qonağa şəhərin tarixi-mədəni irsi, abidələrin bərpası, həmçinin həyata keçirilən infrastruktur və turizm layihələri barədə geniş məlumat təqdim edilib. Qeyd olunub ki, Şuşa Azərbaycanın mədəniyyət paytaxtı kimi regionun sosial, mədəni və iqtisadi həyatında mühüm rol oynayır.