Beynəlxalq Valyuta Fondu (IMF) və İngiltərə Mərkəzi Bankı (BoE) qlobal maliyyə bazarlarında süni intellekt (AI) ilə bağlı yaranan investisiya bumunun “kəskin və qəfil korreksiya riski” daşıdığı barədə xəbərdarlıq ediblər. Hər iki qurumun yüksək səviyyəli rəsmiləri qeyd ediblər ki, süni intellekt texnologiyalarına dair artan nikbinlik və yüksək qiymətləndirmələr 2000-ci illərin dotcom dövrünü xatırladır.
BBN.az xəbər verir ki, IMF rəhbəri Kristalina Georgieva çıxışında bildirib ki, investorların süni intellektin “istehsal səmərəliliyini artırma potensialı” ilə bağlı gözləntiləri çox yüksəkdir və bu əhval “ani şəkildə dəyişə bilər”. Onun sözlərinə görə, bazarda yaranan bu hiperoptimist vəziyyət qəfil korreksiya baş verərsə, dünya iqtisadiyyatı üçün yeni volatillik dalğası yarada bilər.
İngiltərə Mərkəzi Bankının Maliyyə Sabitliyi Komitəsi də oxşar mövqe bildirib. Qurumun hesabatında qeyd olunur ki, AI texnologiyalarına yönələn iri həcmli sərmayələr, xüsusilə texnoloji səhmlərdə, 20 il əvvəlki internet bumu dövründəki dəyərləndirmələrə yaxınlaşır. Bu isə maliyyə aktivlərinin real dəyəri ilə bazar qiyməti arasında kəskin fərq yaradır və risklərin yığılmasına səbəb olur.
Mütəxəssislər bildirirlər ki, investorların süni intellekt texnologiyalarına yönəlik marağı qısa müddətli qazanc gözləntiləri ilə müşayiət olunur, lakin gələcəkdə bu bumun ənənəvi sektorlar və real iqtisadiyyatla balanslaşdırılması vacibdir. Əks halda, texnoloji sektorda yaranacaq mümkün korreksiya, xüsusilə ABŞ və Avropa bazarlarında, maliyyə sabitliyinə ciddi təsir göstərə bilər.
IMF rəhbəri Georgieva həmçinin əlavə edib ki, bu risklər fonunda mərkəzi banklar və hökumətlər “ehtiyatlı pul və fiskal siyasəti” yürütməli, eyni zamanda, innovasiyaları təşviq edən, lakin maliyyə risklərini məhdudlaşdıran yeni tənzimləmə çərçivələri formalaşdırmalıdır.