Niderlandın aparıcı maliyyə qurumlarından olan ING Group 2025-ci il üzrə Azərbaycan iqtisadiyyatı ilə bağlı proqnozlarını aşağı yönəldib.
Bu barədə BBN.az ING-nin hesabatına istinadən xəbər verir.
Məlumata əsasən, bank qrupunun 2025-ci ilin dördüncü rübü üçün Azərbaycanın real ÜDM artımı ilə bağlı gözləntisi əvvəlki 4,5%-dən 4%-ə endirilib. Ümumilikdə isə 2025-ci il üzrə illik artım proqnozu 3%-dən 2,5%-ə azaldılıb. ING Group 2026-cı il üzrə də 2,5%-lik iqtisadi artım proqnozlaşdırır.
Qeyd olunub ki, proqnozların aşağı salınmasına əsas səbəb bu ilin ilk rübündə qeydə alınan zəif iqtisadi göstəricilər olub. Xatırladaq ki, Dövlət Statistika Komitəsinin məlumatına görə, 2024-cü ilin ilk üç ayında ölkədə cəmi 0,3% real iqtisadi artım qeydə alınıb.
Eyni zamanda beynəlxalq reytinq agentlikləri və maliyyə institutları da Azərbaycan üzrə müxtəlif proqnozlar irəli sürüblər. Belə ki, S&P Global bu il üçün 2%, Fitch Ratings 2025-ci ildə 3%, 2026-cı ildə isə 2,4% artım gözləyir. Moody’s isə hər iki il üzrə 2,5%-lik artım proqnozlaşdırır.
Digər beynəlxalq qurumlardan Avropa Yenidənqurma və İnkişaf Bankı (EBRD) 2025-ci ildə 3%, 2026-cı ildə 2,5% artım gözləyir. Beynəlxalq Valyuta Fondu (IMF) isə müvafiq olaraq 3,5% və 2,5%-lik artım proqnozlaşdırıb. Dünya Bankı bu göstəriciləri 2025-ci il üçün 2,7%, 2026-cı il üçün isə 2,4% səviyyəsində qiymətləndirir. Asiya İnkişaf Bankı (ADB) isə Azərbaycan iqtisadiyyatının 2025-ci ildə 3,4%, 2026-cı ildə isə 3,3% artacağını proqnozlaşdırır.