2024-cü ildən etibarən ABŞ dolları “təhlükəsiz liman” aktivi kimi rolunu qismən itirib. Lakin ING bankı bazar ertəsi dərc olunan hesabatında ABŞ valyutasına qlobal tələbatın ümumi azalmasının müşahidə olunmadığını bildirib.
Ötən il dollar indeksi təxminən 10 % azalaraq 2017-ci ildən bəri ən pis nəticəni göstərib. ABŞ-nin qeyri-müəyyən ticarət siyasəti, Donald Trump-ın müttəfiqlərə qarşı rüsumlar tətbiq etmək təhdidləri və Federal Ehtiyat Sistemi (FED) ünvanına səsləndirilən tənqidlər dollar üzərində təzyiq yaradıb.
ING-in hesabatında qeyd olunur ki, 2024-cü illə müqayisədə dollar “təhlükəsiz liman” aktivi kimi dəyərini əhəmiyyətli dərəcədə itirib. Son üç ayda dollar indeksi ilə ABŞ səhmləri və 10 illik xəzinə istiqrazları arasında müşahidə olunan korrelyasiya bu tendensiyanı təsdiqləyir.
Eyni zamanda, ABŞ-dəki xarici aktivlərin 80 %-dən çoxuna sahib olan fərdi investorlar investisiyalarını davam etdirirlər. Bankın qiymətləndirməsinə görə, hazırkı mərhələdə dolların zəifləməsi fundamental deyil və daha çox müvəqqəti xarakter daşıyır.
Qlobal aktivlərdə, öhdəliklərdə, bazar dövriyyəsində və tranzaksiyalarda dolların istifadəsinin təhlili dedollarizasiya prosesinin sürətlənməsinə dair əlamətlər göstərmir.
Hesabatda vurğulanır ki, FED-in müstəqilliyi qlobal maliyyə sabitliyinin əsas sütunlarından biridir və faiz dərəcələrinin əsassız endirilməsi ilə bağlı ittihamlar valyuta bazarında panikaya səbəb ola bilər.
ING-in proqnozuna əsasən, bu il dolların ucuzlaşması ötən ildəki qədər kəskin olmayacaq. Bank ilin sonuna qədər avronun məzənnəsinin 1,22 ABŞ dollarına çata biləcəyini bildirir. Hazırda bu göstərici təxminən 1,18 dollar səviyyəsindədir.