Avropada qeydə alınan həddindən artıq isti hava və quraqlıq Dunay və Reyn kimi əsas su yollarında suyun səviyyəsinin kəskin enməsinə səbəb olub. Bu isə turizm sektorunda, xüsusilə çay kruizləri operatorlarının üçüncü rüb fəaliyyətində narahatlıqlar yaratsa da, “Bernstein” analitikləri “Viking Holdings” (NYSE: VIK) səhmlərinin bu risklərə qarşı dözümlü olduğunu bildirirlər.
Ekspertlərin fikrincə, şirkətin bu cür təbii maneələrin öhdəsindən uğurla gəlməsinin əsas səbəbi onun geniş miqyas üstünlükləridir. Avropa çay kruizlərində ən böyük flota malik olan şirkət Dunay və Reyn üzrə tamamilə eyni standartlara uyğun gəmi modellərindən istifadə edir. Bu isə aşağı su səviyyəsi müşahidə olunan zonalarda sərnişinlərin quru yolu ilə əks tərəfdəki eyni tipli digər gəmilərə təhlükəsiz və rahat şəkildə keçirilməsinə (“ship swaps”) imkan verir.
Hazırda böyük çaylardakı tutumunun əhəmiyyətli hissəsinin bu marşrutların payına düşməsinə baxmayaraq, şirkət heç bir səfəri ləğv etməli olmayıb. Analitiklər yaxın perspektivdə səhmlər üçün ciddi təhlükə görmür və VIK üzrə “outperform” (bazar göstəricilərini üstələmə) reytinqini qoruyub saxlayırlar.