Amerikanın investisiya bankı və maliyyə xidmətləri holdinq şirkəti JPMorgan Chase 2026-cı il üzrə qızılın orta qiymət proqnozunu azaldıb.
Bank qızılın bir unsiyası üzrə orta qiymət proqnozunu 5708 ABŞ dollarından 5243 ABŞ dollarına endirib.
Bankın açıqlamasında bildirilib ki, proqnozdakı düzəliş 2026-cı ilin ilk aylarında müşahidə olunan daha aşağı qiymət səviyyələri ilə əlaqədardır.
Bununla belə, “JPMorgan Chase” 2026-cı ilin sonu üçün əsas ssenari üzrə təxminən 6000 dollar/unsiya səviyyəsində olan proqnozunu dəyişməyib.
Maliyyə qurumu hesab edir ki, ilin ikinci yarısında tələbin yenidən artması qızıl qiymətlərində güclü yüksəlişi dəstəkləyə bilər.
Analitiklər qeyd ediblər ki, neft qiymətlərində artım inflyasiya narahatlıqlarını gücləndirib. Bununla yanaşı, faiz dərəcələrinin uzun müddət yüksək qalacağına dair gözləntilər qızılın qiymətinin son bir aydan çox müddətin ən aşağı səviyyəsinə enməsinə səbəb olub.
Bakı vaxtı ilə saat 09:00-a olan məlumata əsasən, bir unsiya qızılın qiyməti 4540 ABŞ dolları təşkil edib. Qızıl sessiyanın erkən saatlarında isə martın 30-dan bəri ən aşağı səviyyəsini görüb.