KOBİA yanında daimi fəaliyyət göstərən Koordinasiya Qrupunun fəaliyyətinin daha çevik təşkili üçün operativ müzakirə platformalarının və tematik işçi qruplarının yaradılması nəzərdə tutulur.
Müvafiq dövlət qurumlarının nümayəndələrinin iştirakı ilə Kiçik və Orta Biznesin İnkişafı Agentliyi (KOBİA) yanında daimi fəaliyyət göstərən Koordinasiya Qrupunun ilk iclası keçirilib.
Koordinasiya Qrupunun sədri, iqtisadiyyat nazirinin birinci müavini Elnur Əliyev ölkədə sahibkarlığın inkişafı, biznes və investisiya mühitinin davamlı olaraq yaxşılaşdırılması və bu sahədə qanunvericiliyin təkmilləşdirilməsi tədbirləri barədə məlumat verib. Qeyd olunub ki, qarşıdakı ortamüddətli dövr üçün hədəflərə nail olunmasında fəaliyyətdə olan bizneslərin 99%-dən çox hissəsini təşkil edən KOB subyektləri əhəmiyyətli rol oynayır. KOB sektorunun dayanıqlığının artırılması, məhsuldarlığın yüksəldilməsi, KOB-ların böyüməsinin dəstəklənməsi, qarşılaşdıqları maneələrin operativ həlli, hüquqi və tənzimləyici çərçivələrin yeni reallıqlara uyğun təkmilləşdirilməsi, rəqəmsallaşmanın və “yaşıl” yanaşmaların tətbiqinin sürətləndirilməsi, yüksək əlavə dəyər yaradan sahələrdə KOB subyektlərinin sayının artırılması başlıca hədəflər sırasındadır. Bu hədəflərə nail olunmasında, o cümlədən KOB-ların inkişafının daha geniş dəstəklənməsi, aktual məsələlərin çevik həlli üçün aidiyyəti dövlət qurumlarının birgə fəaliyyəti vacibdir. Koordinasiya Qrupu bu baxımdan əlverişli platforma olacaqdır.
KOBİA-nın İdarə Heyətinin sədri Orxan Məmmədov Koordinasiya Qrupunun fəaliyyətinin təşkili ilə bağlı məlumat verib. Bildirilib ki, KOB-lara dəstək məqsədilə KOBİA fəaliyyətini ikitərəfli və çoxtərəfli layihə və təşəbbüslər, sahəvi görüşlər və ictimai müzakirə platformaları vasitəsilə maraqlı tərəflərin sektordakı proseslərə yaxından cəlb edilməsi üzərində qurub. Koordinasiya Qrupunun yaradılması ilə əlaqələndirmə və iştirakçılıq məsələləri məzmun və keyfiyyət baxımından yeni, daha strateji mərhələyə keçib. Qarşıdakı dövrdə Qrupun fəaliyyətinin daha çevik təşkili məqsədilə xüsusi məsələlər üzrə bir neçə qurumun nümayəndələrinin iştirakı ilə operativ müzakirə platformalarının və ya tematik işçi qruplarının yaradılması hədəflənir. KOB sektorunun inkişafına yönəldilmiş fəaliyyətin ölkəmizdə biznes mühitinin daha da təkmilləşməsinə, eləcə də beynəlxalq reytinqlər üzrə mövqeyinin güclənməsinə əlavə dəstək verə biləcəyi nəzərə alınaraq, Koordinasiya Qrupunda müzakirə ediləcək məsələlər və təşəbbüslər Azərbaycan Respublikasının Biznes Mühiti və Beynəlxalq Reytinqlər üzrə Komissiyasına da təqdim ediləcək.
İclasda biznesin maliyyə yükünə dair mövcud vəziyyət və hədəflərə, KOB evlərində G2B xidmətlərin səmərəli təşkilinə, yeni yaradılacaq KOB evləri üzrə dövlət qurumları ilə fəaliyyətin koordinasiyasına dair təqdimatlar keçirilib, müzakirələr aparılıb və dövlət qurumlarının təklifləri dinlənilib.
Koordinasiya Qrupunun üzvləri həmçinin, “Bakı KOB evi”ndə sahibkarlara G2B və B2B xidmətlərin göstərilməsi üçün yaradılmış şəraitlə də tanış olublar.
Qeyd edək ki, mikro, kiçik və orta sahibkarlığın inkişafı sahəsində fəaliyyətin əlaqələndirilməsi məqsədilə Koordinasiya Qrupunun yaradılması 2 dekabr 2022-ci il tarixli “Mikro, kiçik və orta sahibkarlığın inkişafı haqqında” Qanunla təsbit edilib. Nazirlər Kabinetinin 2024-cü il 13 yanvar tarixli Qərarı ilə isə KOBİA yanında daimi fəaliyyət göstərən Koordinasiya Qrupu yaradılıb və əsasnaməsi təsdiq olunub. Koordinasiya Qrupu KOB-ların inkişafı sahəsində fəaliyyətin əlaqələndirilməsi, KOB evlərində Koordinasiya Qrupunda təmsil olun dövlət orqanları ilə KOBİA arasında səmərəli əlaqələndirmənin və operativliyin təmin edilməsi məqsədilə Agentlik yanında yaradılmış dövlət orqanlarının nümayəndələrindən ibarət ictimai əsaslarla daimi fəaliyyət göstərən kollegial orqandır. Koordinasiya Qrupunda 30-a yaxın dövlət qurumunun nümayəndəsi təmsil olunur.