Kriptovalyuta bazarlarında həyəcanlı anlar yaşanır. Son təhlillər Bitcoin-in gələcəyi ilə bağlı təxminən 500 milyard dollarlıq bir aktivin yüksək volatillik riskinə məruz qaldığını göstərir. İnvestorlar üçün “təhlükəsiz liman” sayılan kripto bazarında bu nəhəng rəqəmin təhlükə altına düşməsi bazarda gərginliyi artırıb.
Bu təhlükənin əsas səbəbi nədir?
Məsələnin kökündə “leverage” əməliyyatlar dayanır. Sadə dildə desək, bu, investorların öz cibindəki puldan daha böyük məbləğlərlə, yəni “borc götürərək” ticarət etməsi deməkdir. Məsələn, 100 dolları olan şəxs sistemdən borc alaraq 1000 dollarlıq Bitcoin alır. Qiymət yüksələndə qazancı böyük olur, amma qiymət bir azca düşən kimi, həmin investor bütün pulunu bir anda itirmək təhlükəsi ilə üz-üzə qalır. Hazırda bazarda minlərlə investor məhz bu “borc yükü” ilə hərəkət edir. Qiymətlərdə kiçik bir eniş baş verdikdə, bu insanların hamısı eyni anda “batır” və bu da domino effekti yaradaraq 500 milyardlıq bir aktivin risk altına düşməsinə səbəb olur.
Digər risk faktorları:
Geosiyasi qeyri-müəyyənlik: Yaxın Şərqdəki gərginlik və qlobal iqtisadi siyasətlərdəki dəyişikliklər, investorların daha ehtiyatlı davranmasına və kapitalı kriptovalyutalardan çıxarmağa başlamasına səbəb olur.
İnstitusional təzyiq: Qlobal fondların və böyük investorların portfellerindəki strateji dəyişikliklər, Bitcoin-in 78 min dollar civarındakı müqavimətini sınağa çəkir.
Ekspertlər bildirir ki, bazarın bu “qara buludları” dağıtması üçün güclü bir müsbət xəbər dalğasına ehtiyacı var. Hazırkı məqamda investorlara bazardakı hərəkətliliyi diqqətlə izləmələri və risk idarəetməsini ön planda tutmaları tövsiyə olunur.