Qlobal iqlim dəyişikliyi ilə bağlı mübarizə fonunda dayanıqlı maliyyə taksonomiyaları investisiyaların ətraf mühit və sosial məqsədlərə uyğunlaşdırılmasında mühüm vasitəyə çevrilib. Bu taksonomiyalar “dayanıqlı” təsnifatına uyğunluğu müəyyənləşdirərək investorlar, şirkətlər və aidiyyəti tərəflərə iqlim fəaliyyəti üçün kapitalın bölüşdürülməsi ilə bağlı əsaslı qərarlar qəbul etməyə kömək edir.
Mərkəzi Bank 2022-ci ildən etibarən Beynəlxalq Maliyyə Korporasiyası (BMK) tərəfindən dəstəklənən Dayanıqlı Bankçılıq və Maliyyə Şəbəkəsinin (DBMŞ) fəal üzvü kimi dayanıqlılıq sahəsində mühüm təşəbbüslər həyata keçirir. Mərkəzi Bankın sədri Taleh Kazımovun BMK-nın Latın Amerikası və Karib hövzəsi üzrə vitse-prezidenti Alfonso Qarsia Mora ilə bu strateji təşəbbüslərə dair fikirləri beynəlxalq ictimaiyyətin diqqətinə çatdırılıb.
Məqalədə bildirilib ki, Mərkəzi Bank milli və regional taksonomiyaların, Dünya Bankı Qrupu və Beynəlxalq Valyuta Fondu kimi beynəlxalq təşkilatların müəyyənləşdirdiyi çərçivələrə uyğunlaşdırılmasını təklif edərək dayanıqlı maliyyəyə praktik, həm də qlobal səviyyədə tanınan yanaşmanın təşviqini hədəfləyir.
Bir çox ölkə artıq dayanıqlı maliyyə taksonomiyalarını qəbul etsə də, hüquqi çərçivələr arasında uyğunluğun olmaması müəyyən çətinliklər yaradır. Məqalədə vurğulanıb ki, müxtəlif standartların yaranması investisiya mühitində uyğunsuzluqlara və qlobal səviyyədə tanınan aktiv sinfinin yaradılmasına mane olur. Bu maneələri aradan qaldırmaq üçün vahid qlobal yanaşmanın tətbiqinin zəruri olduğu bildirilib. Belə ki, bu yanaşma universal prinsipləri, tərifləri və göstəriciləri əhatə edərək iqlim maliyyəsinin səmərəli axınını və emitentlər üçün daha yaxşı maliyyə şərtlərini təmin edəcək.
Hər bir ölkənin xüsusi iqtisadi prioritetlərini və çağırışlarını nəzərə alan müştərək dayanıqlı maliyyə yanaşmasının tətbiqi çox vacib olduğu bildirilib.
Məqalədə qeyd olunub ki, Mərkəzi Bank COP29 tədbirində Dayanıqlı Maliyyə üzrə Yol Xəritəsi və Beynəlxalq Dayanıqlı Maliyyə Platformasının Ümumi Çərçivə Taksonomiyası kimi beynəlxalq nailiyyətlərə əsaslanan bir həll yolu təklif edəcək. Mərkəzi Bank milli adaptasiyaya çevik yanaşmanı qorumaqla taksonomiyaların uyğunlaşdırılmasına kömək edən sistemin yaradılması üçün qarşılıqlı fəaliyyət və əməkdaşlığı təşviq edəcəkdir.
Taleh Kazımov Mərkəzi Bankın qarşılıqlı fəaliyyət imkanlarını genişləndirmək və dayanıqlı maliyyə sahəsində innovasiyaları təşviq etmək üçün beynəlxalq tərəfdaşlarla sıx əməkdaşlıq edəcəyini bildirib. O, bu yanaşmanın daha dərin və likvid bazarların yaradılmasına, eləcə də sıfır emissiya hədəflərinə töhfə verəcək yaşıl layihələrə yatırılan investisiyaların təşviq edilməsinə töhfə verəcəyi ilə bağlı əminliyini ifadə edib.
Qeyd olunub ki, Mərkəzi Bank qlobal standartlarla yerli çeviklik arasında balans yaradan mərhələli yanaşmanı müdafiə edir. Mərkəzi Bankın 70-dən çox inkişaf etməkdə olan ölkəni bir araya gətirən DBMŞ ilə qarşılıqlı fəaliyyət qabiliyyətini təşviq edən, həmçinin yerli kontekstləri və prioritetləri nəzərə alan təlimatların hazırlanmasına töhfə verdiyi bildirilib.
Sədr Mərkəzi Bankın dayanıqlı maliyyə taksonomiyalarına qlobal yanaşmanın tətbiqində və sıfır emissiyaya doğru irəliləyişin təmin edilməsində qərarlı olduğunu vurğulayıb.
Məqalə ilə tanış olmaq üçün bu linkə daxil ola bilərsiniz:
How to create a global approach on sustainable finance taxonomies – Sustainable Views