Bu ilin avqust ayında Maliyyə Nazirliyi dövlət büdcəsi vəsaitlərinin daha səmərəli idarə olunması və xəzinə hesabının qalığından əlavə gəlir əldə edilməsi məqsədilə 6 depozit hərracı keçirib.
BBN.az Maliyyə Nazirliyinə istinadən xəbər verir ki, hərraclar nəticəsində xəzinə hesabının ümumilikdə 146 milyon manat qalığı ölkənin kommersiya banklarında müddətli depozitlərə yerləşdirilib.
Avqustun 6-da keçirilən iki hərracın nəticəsində 16 milyon manat 2 kommersiya bankında 28 gün müddətinə, 6,54% orta çəkili faizlə, digər 25 milyon manat isə 1 bankda 84 gün müddətinə, eyni faiz dərəcəsi ilə depozitə yerləşdirilib.
Avqustun 13-də keçirilən hərracda 21 milyon manat vəsait 2 kommersiya bankında 28 gün müddətinə 6,54% orta çəkili faiz dərəcəsi ilə yerləşdirilib.
Avqustun 20-də keçirilən hərracın nəticəsində isə 35 milyon manat 1 kommersiya bankında 84 gün müddətinə 6,53% faizlə depozitə qoyulub.
Ayın sonuncu hərracları avqustun 27-də keçirilib. Onlardan birində 19 milyon manat 2 bankda 28 gün müddətinə 6,52%, digərində isə 30 milyon manat 1 bankda 84 gün müddətinə 6,54% orta çəkili faizlə yerləşdirilib.
Nazirliyin məlumatına görə, bu cür alətlərdən istifadə dövlət vəsaitlərinin idarə edilməsində əlavə gəlirlərin formalaşdırılmasına, eyni zamanda kommersiya banklarında likvidliyin artırılmasına imkan verir.