Mobil ödənişlər günü-gündən istehlakçıların həyatını rahatlaşdırmaqla yanaşı, hər gün sayı artan mobil cüzdan tətbiqetmələri funksiyalarını genişləndirir. Onlayn ödənişlər və pul köçürmələri sahəsində fəaliyyət göstərən “STICPAY” son dövrlərin rəqəmsallaşma yolunda ən böyük trendinə çevrilmiş məfhumlarından biri olan mobil cüzdanların cari dövr üçün statistikasını açıqlayıb.
Hesabata əsasən, 2016-2020-ci illər aralığında Avropada mobil cüzdan ilə ödənişlərin həcmi illik 14% həcmində artıb. Artımın ən böyük hissəsi İspaniya və İsveçin payına düşüb. 2024-cü ilədək isə mobil cüzdan ilə həyata keçirilən ödənişlərin həcmində ortalama 10.1% səviyyəsində böyümə proqnozlaşdırılır.
Məlumat üçün qeyd edək ki, mobil cüzdanlardan istifadənin ən sürətlə yayıldığı dövr 2017-2020-ci illər arası olub. Belə ki, 2017-ci ildə 17.4 milyard dollar dəyərində olan Avropanın mobil cüzdan bazarı, 2018-ci ildə 45%-lik artıma məruz qalaraq 25 milyard dollara çatıb. 2019-cu ildə isə bu göstərici 35 milyard dolları ötüb. Beləliklə, cəmi üç ildə Avropanın mobil cüzdanlar sektorunda 175%-lik artım müşahidə olunub.