Beynəlxalq reytinq agentliyi “Moody’s” Azərbaycan Dövlət Neft Şirkəti (SOCAR) üzrə növbəti planlı qiymətləndirməsini başa çatdırıb. Qiymətləndirmənin nəticələrinə əsasən, şirkətin kredit reytinqi və proqnozu dəyişməz saxlanılıb.
Agentliyin məlumatına görə, qiymətləndirmə reytinq komitəsinin iclası çərçivəsində aparılıb və tətbiq olunan baza metodologiyası ilə son hadisələr nəzərə alınaraq reytinqlərin əsaslandırılması yenidən təhlil edilib. Bununla belə, “Moody’s” bildirib ki, bu proses yeni kredit reytinqi qərarının qəbul edilməsi anlamına gəlmir və yaxın perspektivdə belə bir qərarın veriləcəyinə işarə etmir.
Hazırda SOCAR-ın uzunmüddətli emitent kredit reytinqi “Baa3”, proqnozu isə “sabit” olaraq saxlanılıb. Agentlik qeyd edib ki, bu qiymətləndirmə şirkətin “ba2” səviyyəsində Əsas Kredit Qiymətləndirməsi (BCA), Azərbaycan hökumətinin “Baa3” xarici valyutada kredit reytinqi, dövlətlə yüksək əlaqəlilik və zərurət yarandıqda hökumət dəstəyinin yüksək ehtimalı kimi amillərə əsaslanır.
“Moody’s” SOCAR-ın “ba2” səviyyəli BCA qiymətləndirməsini şirkətin Azərbaycanın neft-qaz sektorundakı strateji mövqeyi, güclü maliyyə göstəriciləri, sağlam kredit profili, yüksək likvidlik ehtiyatları və dövlətlə sıx əlaqələri ilə izah edib. Agentliyin fikrincə, bu amillər ehtiyac yarandığı halda hökumətin şirkətə maliyyə dəstəyi göstərmək imkanını da gücləndirir.