BBN AZ – VAŞİNQTON Qlobal enerji təhlükəsizliyinin mərkəzində dayanan Hörmüz Boğazı ilə bağlı kritik gəlişmə yaşanıb. İran, ABŞ-a boğazın yenidən açılması və hərbi gərginliyin dayandırılması üçün yeni bir təklif paketi təqdim edib.
Axios-un məlumatına görə, Tehranın təklifi Hörmüz Boğazının dərhal açılmasını və müharibənin başa çatmasını nəzərdə tutur. Lakin əsas məqam budur ki, İran tərəfi ən mübahisəli mövzu olan nüvə danışıqlarını daha sonrakı mərhələyə saxlamağı təklif edir. Analitiklər bunu diplomatik çıxılmaz vəziyyətdən çıxmaq üçün atılan strateji addım kimi qiymətləndirirlər.
ABŞ Prezidenti Donald Trampın bu təklifə münasibəti hələlik birmənalı deyil. Tramp iqtisadi blokadanın öz nəticəsini verdiyini və İranın ciddi təzyiq altında olduğunu bildirib. Hazırda Ağ Evdə bu təklifin detalları müzakirə olunur, lakin Vaşinqton nüvə güzəştləri olmadan blokadanı qaldırmağa meylli görünmür.
Qeyd edək ki, Hörmüz Boğazı dünya neft tədarükünün təxminən 20%-nin keçdiyi əsas nöqtədir. Təklif ABŞ-a Pakistan vasitəsilə çatdırılıb və hazırda bölgədə tərəflərin bir-birinə qarşı tətbiq etdiyi “ikili blokada” vəziyyəti hökm sürür.
Donald Trampın bu gün milli təhlükəsizlik komandası ilə xüsusi iclas keçirəcəyi gözlənilir. İclasdan çıxacaq qərar həm neft qiymətlərinə, həm də qlobal bazarların istiqamətinə birbaşa təsir edəcək.