Azərbaycan üzrə ortamüddətli iqtisadi proqnozlar açıqlanıb. Baza ssenariyə əsasən, 2027–2030-cu illərdə neftin bir barelinin orta illik ixrac qiymətinin 65 ABŞ dolları səviyyəsində olacağı gözlənilir.
Bu barədə Azərbaycan Maliyyə Nazirliyi-nin açıqladığı “2027-2030-cu illər üzrə Ortamüddətli Büdcə Çərçivəsi”ndə bildirilib.
Sənədə əsasən, 2027-ci ilin sonuna ölkə üzrə ümumi daxili məhsulun (ÜDM) həcminin 139 milyard manat təşkil edəcəyi proqnozlaşdırılır. Bu göstəricinin 2030-cu ildə 166.9 milyard manata qədər artacağı gözlənilir.
Eyni zamanda iqtisadi strukturda mühüm dəyişikliklərin olacağı qeyd edilir. Belə ki, ÜDM-də qeyri-neft-qaz sektorunun payının artacağı proqnozlaşdırılır. Bu göstəricinin 2025-ci ildəki 71.5 %-dən 2027-ci ildə 78 %-ə, 2030-cu ildə isə 81.8 %-ə çatacağı gözlənilir.
Nazirliyin qiymətləndirmələrinə görə, ortamüddətli dövrdə ÜDM-in real artım tempi orta illik 3.3 %, qeyri-neft-qaz sektoru üzrə isə 4.2 % təşkil edəcək.
Beləliklə, açıqlanan proqnozlar Azərbaycanın iqtisadi artımının əsasən qeyri-neft sektorunun genişlənməsi hesabına təmin ediləcəyini göstərir.