ABŞ-ın aparıcı çip istehsalçısı Nvidianın Çinə yönəlik H200 süni intellekt çiplərinin satışı hələ də qeyri-müəyyən olaraq qalır. Financial Times qəzetinin məlumatına görə, Prezident Donald Trampın ixraca yaşıl işıq yandırmasından təxminən iki ay keçməsinə baxmayaraq, satışlar ABŞ-ın milli təhlükəsizlik yoxlaması səbəbindən ləngiyir.
Məlumata yaxın mənbələr bildirir ki, Çinli müştərilər hələlik Nvidia ilə H200 çipləri üzrə sifariş yerləşdirmirlər. Bunun əsas səbəbi ixrac lisenziyalarının verilib-verilməyəcəyi və mümkün məhdudlaşdırıcı şərtlərin nə olacağı ilə bağlı qeyri-müəyyənlikdir.
Qeyd olunur ki, ABŞ administrasiyası süni intellekt texnologiyalarının Çin kimi ölkələrə ötürülməsini strateji və təhlükəsizlik riski kimi qiymətləndirir. Bu da yüksək performanslı AI çiplərinə dair icazə proseslərinin daha sərt və uzunmüddətli olmasına gətirib çıxarır.
Bazar analitiklərinin fikrincə, bu vəziyyət Nvidia üçün qısamüddətli satış riskləri yaratsa da, eyni zamanda ABŞ–Çin texnoloji rəqabətinin daha da dərinləşdiyini göstərir. Xəbərin fonunda Nvidia səhmləri ticarətdə təxminən 3%-ə yaxın dəyər itirib.