Qızıl qiymətləri dolların zəifləməsi fonunda yüksəlib
BBN.az xəbər verir ki, qızılın qiyməti həftənin ilk ticarət günündə ABŞ dollarının zəifləməsi fonunda artıb. Nyu-Yorkun Comex birjasında iyun ayı üzrə qızıl fyuçerslərinin qiyməti 25,92 dollar və ya 0,8% artaraq bir troy unsiyası üçün 3 269,22 dollar təşkil edib.
Eyni zamanda, iyul ayı üzrə gümüş fyuçersləri də 0,71% bahalaşaraq 1 unsiya üçün 32,487 dollara yüksəlib.
Dolların digər valyutalara nisbətdə dəyərini ölçən dollar indeksi 0,41% azalaraq 99,62 bəndə düşüb. Dolların ucuzlaşması digər valyutalara sahib olan investorlar üçün qızılı daha əlçatan edir və bu da tələbin artmasına səbəb olur.
Bu həftə ABŞ Federal Ehtiyat Sisteminin (FED) növbəti faiz qərarı ilə bağlı iclası keçiriləcək. CME Group-un məlumatına əsasən, analitiklərin 94,8%-i FED-in baza faiz dərəcəsini 4,25–4,5% səviyyəsində saxlayacağını proqnozlaşdırır. Sorğuda iştirak edənlərin qalan hissəsi isə dərəcənin 4–4,25%-ə endiriləcəyini gözləyir. Qərardan asılı olaraq, dolların məzənnəsində dəyişiklik baş verə bilər.