Sentyabrın 28-də Rabitəbank ilə Prezident yanında Dövlət İdarəçilik Akademiyası arasında əməkdaşlıq haqqında memorandum imzalanmışdır. Memorandumu Rabitəbank-ın İdarə Heyətinin sədri Aydın Hüseynov və DİA-nın rektoru Urxan Ələkbərov imzalayıblar.
Yarandığı tarixdən etibarən təhsilin inkişafına xüsusi diqqət göstərən Rabitəbank-ın əməkdaşlıqda məqsədi tələbələrin bilik və bacarıqlarının artırılması, elmi-praktik əlaqələri inkişaf etdirmək, ixtisaslı kadr hazırlığını təmin etmək və ikitərəfli münasibətləri möhkəmləndirmək olmuşdur.
Memorandum çərçivəsində çıxış edərkən Aydın Hüseynov bildirib ki, “Rabitəbank gənclərin gələcəyinə töhfə verməyə çalışır. Buna görə də təhsil müəssisələri ilə qarşılıqlı əməkdaşlıqlar bizim üçün önəmlidir. DİA ilə əməkdaşlığımız çərçivəsində həm tələbələr, həm də bankın əməkdaşları bir çox xüsusi imtiyazlardan yararlana biləcəklər. Qeyd etmək istərdim ki, memorandumun nəticəsi olaraq bakalavriat və magistratura pillələrində təhsil alan tələbələrin Rabitəbankın müvafiq struktur bölmələrində təcrübə və təlim keçmələrinin təşkil edilməsi, tələbələrin elmi-tədqiqat işlərinin aparılması üçün Rabitəbank tərəfindən müvafiq şəraitin yaradılması və bu kimi bir çox tədbirlər nəzərdə tutulmuşdur.”
“Bu gün Azərbaycanın hər bir sahədə sürətlə inkişaf etməsi dövlət idarəçilik sahəsində ixtisaslaşan gənclərin qarşısında mühüm vəzifələr qoyur. Bu vəzifələri uğurla və səmərəli icra etmək üçün dünyada sürətlə yeniləşən nanotexnologiyalardan, yüksək bilik və təcrübədən geniş istifadə olunmalıdır. Bu mövzuda isə böyük maraqlarımızdan biri təcrübəli şirkətlərlə əməkdaşlıqlardır. Rabitəbank-la əməkdaşlığımızın uğurlu olacağına inanır, gələcəkdə əməkdaşlığın daha da genişlənməsi üçün müxtəlif tədbirlər görməyi planlayırıq.” – Urxan Ələkbərov bildirib.