Böyük Britaniyanın aparıcı rəqəmsal maliyyə şirkətlərindən biri olan Revolut, ABŞ-da bank satın almaq imkanlarını araşdırdığını açıqlayıb. Şirkət bu addımı qlobal genişlənmə strategiyasının bir hissəsi olaraq atmaq niyyətindədir.
BBN.az xəbər verir ki, Revolut həmçinin, yaxın aylarda özünün daxili bazarı olan Böyük Britaniyada kredit kartlarının istifadəyə verilməsini planlaşdırır.
Mərkəzi Londonda yerləşən Revolut, hal-hazırda 65 milyon istifadəçi ilə Avropanın ən dəyərli fintech şirkətlərindən biri hesab olunur. Müqayisə üçün qeyd edək ki, bu göstərici HSBC Bankının müştəri sayını keçib. Bununla belə, şirkətin gəlirləri ənənəvi banklarla müqayisədə hələ də nisbətən azdır, çünki əsasən istehlak bazarına fokuslanıb.
Revolut rəhbərliyi, şirkətin 75 milyard ABŞ dolları dəyərində qiymətləndirmə ilə ikincil səhmlərin satışını planlaşdırdığını da bildirib.
Hazırda şirkət ABŞ bazarında daha güclü mövqe tutmaq və rəqəmsal maliyyə xidmətlərini genişləndirmək üçün uyğun bankların axtarışındadır.