Dünyada çox az ölkədə gəlir vergisi dərəcəsi Azərbaycandakı qədər aşağıdır.
BBN.az xəbər verir ki, bu fikri maliyyə naziri Sahil Babayev Milli Məclisin İqtisadi siyasət, sənaye və sahibkarlıq komitəsində “2026-cı il dövlət büdcəsi haqqında” qanun layihəsinin müzakirəsi zamanı səsləndirib.
Nazir bildirib ki, gələn ildən 2 500 manata qədər olan aylıq gəlirlərə cəmi 3% gəlir vergisi tətbiq ediləcək. Onun sözlərinə görə, bu dəyişiklik ümumi fiskal yükün azaldılması ilə paralel şəkildə həyata keçirilir.
Sahil Babayev qeyd edib ki, əvvəllər Azərbaycanda ümumi fiskal yük 52–55% aralığında idi, hazırda isə bu göstərici 37%-ə endirilib. Bununla yanaşı, hökumət gəlir vergisi üzrə sabit dərəcələr sisteminə keçir:
-
2026-cı ildə gəlir vergisi – 3%
-
2027-ci ildə – 5%
-
2028-ci ildə – 7%
Sonrakı illər üçün bu dərəcələr davamlı olaraq 7% (2 500 manata qədər gəlirlər üçün), 10% (8 000 manata qədər) və 14% (8 000 manatdan yuxarı) səviyyəsində saxlanılacaq.
Nazir vurğulayıb ki, bu qərar həm vətəndaşlar, həm də sahibkarlar üçün mühüm güzəşt xarakteri daşıyır:
Sahil Babayevin sözlərinə görə, yeni vergi dərəcələri özəl sektorun, xüsusilə kiçik və orta sahibkarlığın inkişafına, eləcə də investisiya və infrastruktur layihələrinin genişlənməsinə əlavə stimul yaradacaq.