Beynəlxalq reytinq agentliyi “S&P Global Ratings” Azərbaycanın kredit əsaslarının orta müddətdə yaxşılaşacağını proqnozlaşdırır.
Agentliyin açıqlamasında bildirilir ki, Azərbaycan güclü fiskal və xarici buferlərə malikdir. Bu, Dövlət Neft Fondu (SOFAZ) tərəfindən idarə olunan iri həcmli aktivlərlə dəstəklənir. Davamlı müsbət dövlət xalis aktiv mövqeyi və aşağı dövlət borcu ölkənin iqtisadiyyatının şoklara davamlılığını artırır, karbohidrogen qiymətlərindəki dəyişkənliyin təsirini yumşaldaraq makroiqtisadi sabitliyi qoruyur.
“S&P” qeyd edir ki, geosiyasi risklərin azalması və fiskal buferlərin qorunması şəraitində Azərbaycanın kredit reytinqlərinin perspektivi yaxşılaşa bilər: “Rəsmi sülh müqaviləsi hələ yekunlaşmasa da, son öhdəliklər və ilkin icra addımları ikitərəfli münasibətlərdə ən konstruktiv mərhələnin başlanğıcını göstərir. Bu proses investisiya mühitini yaxşılaşdıracaq və iqtisadi artım potensialını artıracaq”.