İqtisadi İslahatların Təhlili və Kommunikasiya Mərkəzinin Enterprise Azerbaijan portalı və ABŞ-ın Nevada Universitetinin Özmən Sahibkarlıq Mərkəzinin birgə təsis etdiyi “StartUp School”da həmin universitetin professoru Mət Vestfild (Matt Westfield) “Bazarlar və marketinq” mövzusunda treninq keçib.
Treninq əsasən az maliyyələşdirilən startaplara ən çox təkan verən marketinq üsullarına həsr olunub. Professor Mət Vestfild qeyd edib ki, bu istiqamətdə atılacaq ilk addım əsas və ikinci dərəcəli müştərilərin müəyyənləşdirilməsi ilə başlayır. Məruzəçi treninq ərzində startapçılar ilə birgə hər bir təsisçi üçün bazardan, müştəri seqmentindən və spesifikliyindən asılı olaraq, müxtəlif marketinq üsullarının araşdırmasını aparıb. Bu istiqamətdə həmçinin startapçılara xüsusi tapşırıqlar verilib.
Bu kursun əsas məqsədi tələbələrin bazarda nüfuz və son uğuru müəyyən edə bilən bazar seçimi, həmçinin seqmentləşdirmə anlayışlarını inkişaf etdirməkdir.
Qeyd edək ki, treninqlərin sonunda seçilən 9 layihə (komanda) “SABAH.Lab”ın İnkubasiya Mərkəzində 2 həftə ərzində mentorluq proqramına qatılacaq. Xüsusi ekspertlər layihələr arasından ilk 3 yerin qalibini müəyyənləşdirəcək.