“Yelo Bank”la bağlı hər hansı problem müşahidə olunmur.
Bu barədə Taleh Kazımov bu gün keçirilən mətbuat konfransında bildirib.
Azərbaycan Mərkəzi Bankı sədrinin sözlərinə görə, Avropa İttifaqının sanksiya paketinə Yelo Bankın daxil edilməsi anlaşılmazlığın nəticəsidir.
T.Kazımov qeyd edib ki, bankın Rusiya sisteminə qoşulması Rusiya–Ukrayna münaqişəsindən əvvəl baş verib və həmin sistem artıq fəaliyyətini dayandırıb.
“Yelo Bank həm likvidlik, həm də kapital adekvatlığı baxımından kifayət qədər dayanıqlıdır. Sadəcə bank tərəfindən ödənişlərdə müəyyən çətinliklər yarana bilər”, – deyə AMB sədri bildirib.
O əlavə edib ki, məsələnin səbəblərinin araşdırılması üçün müvafiq instansiyalara müraciət olunacaq.
“Ümid edirik ki, növbəti aylarda Aİ qərarını dəyişəcək. Çünki bunun üçün əsas yoxdur”, – deyə T.Kazımov vurğulayıb.