Yaponiyanın avtomobil nəhəngi “Toyota Motors Corp” elektriklə işləyən avtomobil bazarında rəqabət qabiliyyətliliyini yüksəltmək məqsədilə daha bir irihəcmli investisiya layihəsi planlaşdırıb. “Toyota” tərəfindən yayılan məlumata görə, ABŞ-ın Şimali Karolina ştatında yeni elektromobil batareyası istehsalı üçün zavod inşasına başlanılacaq.
İstehsal prosesinin 2025-ci ildə başladılması planlaşdırılan zavodun inşası üçün şirkət tərəfindən ilkin olaraq 1.29 milyard dollar həcmində vəsait ayrılıb. Şimali Karolina ştatının İqtisadi İnvestisiyalar Komitəsi tərəfindən zavodun inşası üçün “Toyota” şirkətinə 438.7 milyon dollarlıq stimul paketi veriləcək. Yeni zavodun inşası tamamlandıqdan sonra, zavodun istehsal proseslərində təqribi 1750 nəfərin işlə təmin olunacağı güman edilir.
“Toyota” şirkəti elektromobil batareyası istehsalına növbəti on il ərzində 13.6 milyard dollardan artıq vəsait yatıracağını açıqlayıb. Ümumilikdə isə, “GlobalData” data analitikası şirkəti tərəfindən aparılan araşdırmalara əsasən, elektromobil batareyası istehsalı 2024-cü ilə qədər 95.3 GWh səviyyəsindən 410.5 GWh səviyyəsinə yüksəldiləcək.