ABŞ prezidenti Donald Trampın Avropaya qarşı yeni tarif və ticarət müharibəsi təhdidləri bazarlarda gözlənilməz dalğalanma yaradıb. Bu fonda çərşənbə axşamı günü texnologiya səhmləri kəskin ucuzlaşıb.
Nvidia və Tesla səhmləri 4%-dən çox dəyər itirib. Broadcom-un səhmləri 5%-dən artıq geriləyib. Amazon və Apple təxminən 3%, Meta və Alphabet isə 2%-dən çox ucuzlaşıb.
AI yönümlü bulud xidməti provayderi Oracle səhmləri təxminən 6% enib. Nvidia-nın dəstəklədiyi yeni nəsil süni intellekt şirkətləri Nebius və CoreWeave müvafiq olaraq 9% və 6% dəyər itirib.
Texnologiya şirkətlərinin üstünlük təşkil etdiyi Nasdaq Composite indeksi günü 2,4% azalma ilə başa vuraraq əsas indekslər arasında ən zəif nəticəni göstərib. Satış dalğası Trampın Avropaya qarşı sərt ritorikasını davam etdirməsi və Qrenlandiya ilə bağlı açıqlamaları fonunda baş verib.
Analitiklər qeyd edir ki, investorlar riskli aktivlərdən çıxaraq daha təhlükəsiz mövqelərə keçirlər. Eyni zamanda, bazarda süni intellekt sahəsində mümkün “balon”la bağlı narahatlıqlar da qalmaqdadır.
Bloomberg məlumatına görə, “Möhtəşəm Yeddilik” adlandırılan iri texnologiya şirkətləri 2026-cı ilin əvvəlindən etibarən təxminən 4,5% geriləyib. Bu göstərici Nasdaq və S&P 500 indekslərinin itkilərindən daha yüksəkdir.
Bununla belə, Wedbush analitiki Den Ayvs bu enişi alış fürsəti kimi qiymətləndirərək bildirib ki, süni intellekt inqilabı hələ ilkin mərhələdədir və uzunmüddətli perspektivdə texnologiya sektoru üçün potensial yüksək olaraq qalır.
Qeyd edək ki, yaxın həftələrdə Tesla, Meta və Microsoft da daxil olmaqla iri texnologiya şirkətləri maliyyə hesabatlarını açıqlayacaqlar ki, bu da bazar üçün mühüm siqnallar verə bilər.